2025eko ekainak 9
Zizurrek bat egin du Nafarroako Udal eta Kontzejuen Federazioak eta Nafarroako Gobernuak Eliza Katolikoak immatrikulatutako ondasun komunalak ikertzeko sinatutako hitzarmenarekin.
Zizur Nagusiko Udalak onartu du Nafarroako Udal eta Kontzejuen Federazioak (NUKF) eta Nafarroako Gobernuak sinatutako hitzarmenarekin bat egitea. Hitzarmen horren helburua da Eliza Katolikoak azken hamarkadetan immatrikulatutako herri ondasunen existentzia ikertzea.
Hitzarmenak ez die inolako kosturik eragiten toki erakundeei, eta, horri esker, langile tekniko espezializatuak izango dira, beren borondatez bat egiten duten udalerrietan artxibo eta dokumentu ikerketak egiteaz arduratuko direnak. Zizurren kasuan, gutxienez sei ondasun identifikatu dira immatrikulatuta, horien artean landa eremuak, eta horien titulartasun historikoa sakonago aztertu ahal izango da.
Erabaki horren bidez, Udalak bere ondarea babestu nahi du, ondasunen erregistroan egon daitezkeen irregulartasunak argitu eta informazio zorrotza izan, hala badagokio, berreskuratzera bideratutako ekintza administratiboak edo judizialak abiarazteko.
Mozioa Geroa Bai, EH Bildu, PSN eta AS Zizurren aldeko 11 botorekin eta UPN eta PPNren kontrako 5 botorekin onartu da.