Zizur Nagusia eta Iruñea elkarlanean bi udalerrien arteko lotura hobetzeko
Jon Gondan eta Joseba Asiron Zizur Nagusiko eta Iruñeko alkateak hurrenez hurren, bat etorri dira bi udalerrien arteko lotura hobetzeko beharrarekin, garraio publikoa eta mugikortasun iraunkorra lehenetsiko dituen proiektu baten bidez, Etxabakoitzeko PSISen esparruan. Duela gutxi egindako bileran, agintariek adierazi zuten Arostegi etorbidea luzatzea aukera hobea dela erronda motako bide bat baino. Horrela, hiri-lotura integratu bat bilatzen da, Zizur Nagusiaren eta Iruñearen arteko zirkulazioa erraztuko duena.
Topaketan, proiektuak aurrera egin aurretik bi udalerrien arteko mugak zehaztearen garrantzia nabarmendu zen, mugakide diren eremuetan kudeaketa eta zerbitzu arazoak saihesteko, Erripagaña auzoan behatutakoak kasu, hainbat udalen arteko koordinazioa eskatzen baitu.Ildo beretik, gertuko beste udalerri batzuk ere tartean sartzearen garrantzia azpimarratu zen, hala nola Barañain eta Zizur Txikia. Alkateek bilera bat antolatzea aurreikusten dute udal horiekin 2025. urtearen hasieran, plangintza integratu batean aurrera egiteko.
Mugikortasun iraunkorrarekiko konpromisoa
Konexioak hobetzeaz gain, Gondanek eta Asironek bizikletentzako aparkalekuen hitzarmena sinatu berri dute, Eguesibarrekin eta Berriozarekin batera, eskualde osoan bizikletentzako aparkaleku estaliak bateratzen dituena. Bizikleta elektrikoak alokatzeko eskualde-sistema bat garatzeko aukera ere aztertu zuten, garraio alternatiboen erabilera sustatuz.
Azkenik, topaketan Iruñerriko Mankomunitatearentzat interesgarriak diren beste gai batzuk jorratu ziren, bereziki eskualdeko hiri-garraioa (TUC) eta Hiri Mugikortasun Jasangarriaren Plana (PMUS) bultzatzea.
