Ayuntamiento de Zizur Mayor

Topaketan, udalerrian berdintasunaren arloan egindako bidea nabarmendu da. Bide hori 2004 eta 2005 urteen artean hasi zen ematen, eta 2007an amaitu zen, Zizur Nagusiko Udaleko egungo Berdintasun eta Aniztasun Zerbitzuaren sorrerarekin. Orduz geroztik, berdintasun-politikak sendotuz joan dira emakume askoren etengabeko lanari eta konpromisoari esker; izan ere, emakume horiek, erantzukizun politiko eta sentsibilitate desberdinetatik, tokiko erakundea eta gizartea eraldatzen lagundu dute.Ekitaldiari esker, gelditu eta atzera begiratu ahal izan dugu, udalbatzatik igaro diren emakume bakoitzaren ekarpena aitortzeko. Horretarako, sigletatik edo etapa zehatzetatik haratago dagoen horretan jarri dugu arreta: udalerriarekiko eta herritarrekiko konpromisoan. Arratsaldean zehar esperientziak, bizipenak eta hausnarketak partekatu dira, eta agerian utzi dute emakumeen presentziak gero eta eragin handiagoa izan duela politika egiteko moduan eta Zizur Nagusi berdintasunezkoago eta anitzago baten eraikuntzan.

Topaketa giro hurbil eta atseginean egin da, belaunaldien arteko elkarrizketarako eta berriz elkartzeko pentsatuta, eta berdintasuna denboran zehar eraikitzen den prozesu kolektibo bat delako ideia indartzeko ere balio izan du, ekarpen anitz eta osagarriekin.

Ekimen horren bidez, Zizur Nagusiko Udalak berretsi egiten du tokiko memoria feminista aitortzeko konpromisoa, bai eta berdintasuna, aniztasuna eta emakumeen parte-hartzea udal-ekintzaren erdigunean kokatzen dituzten politika publikoen jarraipena ere.