Badatoz San Andres Festak, gazteen hitzordu nagusia
Zizur Nagusia prestatzen hasia da urteko asteburu itxaroenetako bat bizitzeko. Azaroaren 29an eta 30ean ospatzen diren 2025eko San Andres Festak inoiz baino indartsuagoak datoz. Hasieran egutegiko beste festa bat gehiago zena, gaur egun zizurtar gazteen festa nagusi gisa finkatu da, pixkanaka prestatutako egitarau batekin, festak gehien bizi dituztenen ekarpen zuzenekin: udalerriko gazteen ekarpenak.
Urte osoan zehar iritzi, balorazio eta proposamenak bildu dira, hobekien funtzionatzen duten ekitaldiei eusteaz gain, berrikuntzak sartu eta gehien baloratzen dena indartzeko: janaria eta pintxoen banaketa, kontzertuak eta udalerriko mugak gainditzen dituen bizikidetza giroa. Izan ere, urtetik urtera gero eta gehiago dira festa asteburu honetan Zizur elkargune gisa aukeratzen duten Iruñerriko koadrilak.
Adin guztientzako bazkariak, kontzertuak eta jarduerak
Larunbatean, hilak 29, festak Udalbatza Txikiak Udaletxetik jaurtiko duen suziriarekin hasiko dira. Egunean zehar 18 eta 35 urte bitarteko gazteentzako bazkari herrikoia izango da, kalejira Txaranga Deliriumekin, haurrentzako jarduerak, zezen mekanikoa, herri kirolak, karaokea… eta musika gau handi bat The Titanians, La Mala Pékora eta Blessive DJrekin Erreniegako estalian. Eguna amaitzeko, ohiko zezensuzkoa eta salda eta pintxoa banatuko dira.
Igandea, hilak 30, tradizioaren eta belaunaldien arteko elkarbizitzaren eguna izango da, San Andresen omenezko mezarekin, auroroekin, erraldoiekin, musika bandarekin, dantzekin, gabonetako argiak piztearekin, txokolatadarekin eta gymkhanaren sari banaketarekin.
Balio handiko festa: bizikidetza, errespetua eta parte hartzea
Udalak azpimarratu du festa hauek dibertimendua baino askoz gehiago direla. Gazteek parte hartzeko eredu bat da, eta gazteen ahotsak benetako pisua du egitarauan. Horregatik, jaiak errespetuz, alaitasunez eta bizikidetzaz jarduteko deia egiten da, mundu guztiak berdintasunean gozatu ahal izan dezan.
Aurreko edizioetan bezala, Harrera Gune Feminista martxan egongo da hilaren 29an, larunbata, 22:00etatik 4:00etara, Erreniegako estalpean, erasoen arretarako eta prebentziorako erreferentziazko gune gisa.
Udalak herritar guztiak gonbidatzen ditu asteburu berezi honetaz gozatzera. Izan ere, Zizur herri bizia, gaztea eta anitza da, eta jai hauetan hori nabari da.